العهد الابدي

السلام عليكم ،
اكيد معظمنا انتبه للعهد الابدي اللي موجود في الدوسيات اللي بين ايدينا، بس عندي تساؤل (مش عن مضمون العهد بحد ذاته ) ولكن عن الخلفية اللي بتتضمن صورة قبة الصخرة المشرفة ، والسؤال انه ليش دائما بس نحكي عن المسجد الاقصى بيخطر ببالنا او تعرض امامنا صورة مسجد قبة الصخرة ، وهاد الحكي يمكن ما يكون مقصود منا ولكن للاسف نجحت بعض وسائل الاعلام وخاصة الفضائيات (واحنا بنعرف انه في نسبة لا يستهان فيها اعلامها مدسوس وموجه) في انها تستبدل صورة المسجد الاقصى بقبة الصخرة المشرفة في محولة لمحو صورة المسجد الاقصى من ذاكرتنا ، يمكن جيلنا ما تنطوي عليه الحيلة ولكن اذا اختفى حضور الصورة في اذهانا اكيد ما رح تضل بأذهان الاجيال اللي بعدنا واللي ما رح يكون عندهم اي صورة اصلا حتي تنمحي ، وهيك على ما اظن رح نعمل اكبر غلط بحق اولى القبلتين وأكيد رح تلومنا الاجيال اللي بعدنا تماما مثل ما كل يوم بنلوم الاجيال اللي سبقتنا بانهم ما دافعوا عن القدس لآخر نقطة دم فيهم (وكأناكان ممكن نحنا نعمل اكثر من هيك).
خلاصة الموضوع انه نحنا كطلاب جامعيين ويفترض انا واعيين ما نشارك بالمخطط التهويدي اللي بيهدف لطمس هوية المقدسات الاسلامية بالقدس وغيرها بالتنبيه للمؤامرة الصهيونية ضد المسجد الاقصى والمتمثلة بالحفريات بحثا عن الهيكل المزعوم واللي بتهدد المسجد الاقصى ( وليس مسجد قبة الصخرة ) بفعل اي هزة فعلية او مفتعلة ، دورنا اذا ما قدرنا نغير بايدنا نحاول على الاقل باضعف الايمان .

الله يجزيك الخير ،،،
وبتمنى من شباب اللجان يحاولو يعدلو الدوسيات ،على الاقل في السنوات القادمة ،،،

ويمكن اقل شيء مطلوب من جيلنا انو كل واحد في المستقبل يربي اولاده على هالقيم ، ويحاول يغرس فيهم محبة المقدسات والدفاع عنها، لعل وعسى يكون من بينهم صلاح الدين جديد يحرر المقدسات..

مشكورة وكلام جميل فعلا

وان شاء الله الاخوة في اللجنة ينتبهوا لهالنقطة

وفعلا هناك لبس كبير بين المسجد الاقصى وقبة الصخرة

مشكورين على هذه الملاحظة المهمة والنفس المؤمن الواعي
وان شاء الله وح ننتبه لهذه النقطة قريبا
وبنبشر الاخوة والاخوات عن تاسيس تجمع شبابي وعلى مستوى وطنا الاردن لتبني قضايا وهموم القدس والدفاع عن قضاياها اسمه "شباب من اجل القدس" وقريبا ستلحظ انشطته
الشكر للجمبع